ஆஸ்திரேலிய அணி இறுதி போட்டிக்கு தகுதி

முத்தரப்பு கிரிக்கெட் தொடரின் இறுதிப்போட்டிக்கு ஆஸ்திரேலிய அணி தகுதி பெற்றுள்ளது


வெஸ்ட் இண்டீஸ், ஆஸ்திரேலியா, தென் ஆப்பிரிக்கா ஆகிய அணிகள் 
மோதும் கிரிக்கெட் போட்டி வெஸ்ட் இண்டீசில் நடந்து வருகிறது. ஒவ்வொரு அணியும் மற்ற அணியுடன் தலா 3 முறை மோத வேண்டும். 

பார்படோசில் நேற்று நடந்த 8-வது லீக் ஆட்டத்தில் ஆஸ்திரேலியா வெஸ்ட் இண்டீஸ் அணிகள் மோதின. முதலில் விளையாடிய வெஸ்ட் இண்டீஸ் 50 ஓவரில் 8 விக்கெட்டுக்கு 282 ரன் எடுத்தது. சாமுவேல்ஸ் 125 ரன்னும், ராம்தின் 91 ரன்னும் எடுத்தனர்.

அடுத்து விளையாடிய ஆஸ்திரேலியா 48.4 ஓவரில் 4 விக்கெட் இழப்புக்கு 283 ரன் எடுத்து 6 விக்கெட் வித்தியாசத்தில் அபார வெற்றி பெற்றது. இந்த வெற்றி மூலம் ஆஸ்திரேலியா 15 புள்ளியுடன் இறுதிப் போட்டிக்கு தகுதி பெற்றது.